ಮುಪ್ಪು ಬದುಕು

ಮನಸ್ಸಲಿ ತಳಮಳ
ಭಾವನೆಗಳು ಸುಪ್ತ
ಆಗು ಹೋಗುಗಳ ಅರಿವಿಲ್ಲ !

ಶೂನ್ಯ ಆಲೋಚನೆ
ಏಕಾಂತದ ಬಯಕೆ
ಎಲ್ಲೊ ದೂರ ಹೋಗಬೇಕೆಂಬ ಇಚ್ಛೆ !

ಕರಗಿದ ಶರೀರ
ಸೇರದ ಆಹಾರ
ಇಲ್ಲ ಪ್ರಪಂಚದ ಗೋಚರ !

ಸೋತ ಕಲ್ಪನೆ
ಅರ್ಥವಾಗದ ಕನಸು
ಏನೂ ಬೇಡ ಎಂಬ ವಿಚಾರ!

ಅನಂತ ರೋಗ
ದಿನ ರಾತ್ರಿ ಮದ್ದಿನ ಭೋಗ
ಶಕ್ತಿ ರಹಿತ ತ್ರಾಣವಿಲ್ಲದ ಜೀವ !

ಅತೃಪ್ತ ಜೀವನ
ಮುಗಿದ ಯೌವನ
ಭಾರವಾಗಿದೆ ಮುಪ್ಪು ಬದುಕು !
by ಹರೀಶ್ ಶೆಟ್ಟಿ , ಶಿರ್ವ

ಹೊಸ ಬೆಳಕು ಮತ್ತು ತಾವರೆ

ಆಕಾಶದ ದ್ವಾರ ತೆರೆದು
ರವಿ ಹೊರ ಬಂದು ಹರಡುತ್ತಿದ್ದಾನೆ
ತನ್ನ ಕಿರಣಗಳನ್ನು ಹರ್ಷದಿಂದ!

ಕತ್ತಲ ನಿಲುವಂಗಿ ತೊರೆದು
ಧರೆ ಹೊಸ ಬೆಳಕು ಪಡೆದು
ಮೆರೆದಾಡುತ್ತಿದೆ ಹೆಮ್ಮೆಯಿಂದ!

ಮುಂಜಾನೆ ಆಯಿತು
ತಾವರೆ ತೆರೆಯುತ್ತಿದೆ
ತನ್ನ ದಳಗಳನ್ನು ನೆಮ್ಮದಿಯಿಂದ !

ಮುದುಡಿದ ತಾವರೆ
ಪಕಳೆ ತೆರೆದು ಅರಳಿತು
ಪರಿಸರ ಮೆರೆಯಿತು ಸೌಂದರ್ಯದಿಂದ !

ಮಂದ ಮಂದ ಶಾಂತ ಸರೋವರ
ಸಪ್ತ ಬಣ್ಣದ ಬಟ್ಟೆ ಧರಿಸಿ ಹೊರಡುತ್ತಿದೆ
ಹರಿಯಲು ಆನಂದ ಉಲ್ಲಾಸದಿಂದ !

ಅನೇಕ ಆಸೆ ಆಕಾಂಕ್ಷೆಗಳನ್ನು ಜನಿಸಿ
ತಾವರೆಯ ಎಸಳು ಹೊಳೆಯುತ್ತಿದೆ 
ಬೆಳಿಗ್ಗೆಯ ಸೂರ್ಯ ಕಿರಣದಿಂದ !
by ಹರೀಶ್ ಶೆಟ್ಟಿ, ಶಿರ್ವ

ಪ್ರೀತಿಯ ಆ ದಿನ

ಆ ದಿನಗಳು ಎಷ್ಟು ಚಂದ
ಮಧ್ಯಾಹ್ನದ ಉರಿ ಬಿಸಿಲಲ್ಲಿ
ನೀನು ಬಂದು ಮಾವಿನ ಮರದ
ಹಠಮಾರಿ ಛಾಯೆಯಲಿ
ನನ್ನನ್ನು ಕಾಯುತ ಕುಳಿತು ಕೊಳ್ಳುತ್ತಿದ್ದೆ!

ನಾನು ನನ್ನ ನಿತ್ಯ ಸ್ವಭಾವದಂತೆ
ವಿಳಂಬವಾಗಿ ಹಿಂದೆಯಿಂದ ಬಂದು
ನನ್ನ ಕೈಯಿಂದ
ನಿನ್ನ ಕಣ್ಣು ಮುಚ್ಚಿ
ಯಾರೆಂದು ಕೇಳುತ್ತಿದ್ದೆ !

ನೀನು ನಿನ್ನ ಸುಳ್ಳು ಕೋಪ
ತೋರಿಸಿ ಮುನಿದಾಗ
ನಾನು ನಿನ್ನನ್ನು ಸತಾಯಿಸುತ
ನಿನ್ನನ್ನು ಇನ್ನೂ ರೇಗಿಸುತ
ನಂತರ ನಿನ್ನನ್ನು ಒಲಿಸುತ್ತಿದ್ದೆ !

ಪ್ರೀತಿಯ ಬರದಲಿ
ನೀನು ನನ್ನನ್ನು ಅಪ್ಪಿಕೊಂಡಾಗ
ನಾನೂ ನಿನ್ನನ್ನು ಅಪ್ಪಿಕೊಂಡು
ಗಾಳಿಯು ಸುಸ್ತಾಗಿ ನಮ್ಮ ಮಧ್ಯೆದಿಂದ
ಹೋಗಲಾರದೆ ತನ್ನ ಮಾರ್ಗ ಬದಲಾಯಿಸುವಂತೆ ಮಾಡುತ್ತಿದ್ದೆ !

ಜೀವನದ ಪರಿಪಕ್ವತೆ
ನಾವಿಬ್ಬರು ತಿಳಿದಾಗ
ನಾವು ನಮ್ಮ ಪವಿತ್ರ ಪ್ರೇಮವನ್ನು ಮರೆತು
ಪ್ರತ್ಯೇಕವಾದ ನಂತರವೂ
ನಾನು ಆ ಮಾವಿನ ಮರದ ಅಡಿಯಲ್ಲಿ ಕುಳಿತು ನಿನ್ನನ್ನೆ ಕಾಯುತ್ತಿದ್ದೆ !
by ಹರೀಶ್ ಶೆಟ್ಟಿ, ಶಿರ್ವ

ರಂಗೋಲಿ ಮತ್ತು ಅವಳು

ಸಣ್ಣ ದೊಡ್ಡ ಚೌಕವ ಬಿಡಿಸಿ 
ವಿವಿಧ ಬಣ್ಣವ ತುಂಬಿ
ರಚಿಸಿದಳವಳು
ಜೀವನದ ಸುಂದರ ರಂಗೋಲಿ !

ಅವಳ ಜೀವನ ಹೀಗೆಯೇ
ಅನಾಥಾಲಯದಲಿ ಪಾಲನೆ
ಅಲ್ಲಿಯೇ ಶಿಕ್ಷಣೆ
ರಂಗೋಲಿಯಂತೆ ಸ್ವತಃ ಬರೆದಿದ್ದಳು ತನ್ನ ಹಣೆ !

ಸ್ವಾವಲಂಬಿ ಜೀವನ
ಕಷ್ಟ ನೋವುಗಳು ಘನ
ಸತ್ಯದ ಮಾರ್ಗ ಕಠಿನ
ಬದುಕಿನ ರಂಗೋಲಿ ಆಗಿತ್ತು ಸುಂದರ ಪಾವನ !

ಆದರೆ ಕ್ರೂರ ಜಗತ್ತು
ರಂಗೋಲಿಯ ಸೌಂದರ್ಯ ನೋಡಿ
ಆಯಿತು ಹೊಟ್ಟೆಕಿಚ್ಚು
ಅವಳ ಜೀವನದ ರಂಗೋಲಿಗೆ ಮಸಿದರು ಕಪ್ಪು!

ಆದರೆ ಅವಳು ಧೀರೆ
ಮಿಶ್ರಿತ ಬಣ್ಣಗಳನ್ನು ಒಟ್ಟು ಮಾಡಿ
ಪುನಃ ರಚಿಸಿದಳು ರಂಗೋಲಿ
ಜೀವನ ಆಯಿತು ಆಕರ್ಷಕ ಸುಂದರ ಅದ್ಬುತ ಮನೋಹರೆ !
by ಹರೀಶ್ ಶೆಟ್ಟಿ, ಶಿರ್ವ

ಇನ್ನೊಂದು ಜೀವನ

ನನ್ನ ಭಾವನೆಯ ಒಸರಿಂದಾಗಿದೆ
ನನ್ನ ಕಾವ್ಯ
ಭೂಮಿಯಲಿ ವಸಂತದ ಹಸಿರು!

ನನ್ನ ಕಲ್ಪನೆಯ ಓಟದಿಂದಾಗಿದೆ
ನನ್ನ ರಚನೆಯ
ಕಣಕಣದಲ್ಲಿ ಹೊಸತನದ ಉಸಿರು!

ನನ್ನ ಪದಗಳ ಚೆಂದದಿಂದಾಗಿದೆ
ನನ್ನ ಕವಿತೆಯಲಿ
ನನ್ನದೇ ಶೈಲಿಯ ನೆರಳು!

ನನ್ನ ಬರವಣಿಗೆಯ ಆಸಕ್ತಿಯಿಂದಾಗಿದೆ
ನನ್ನ ಈ ಇನ್ನೊಂದು ಜೀವನ
ಸಾಹಿತ್ಯ ಲೋಕದಲಿ ಸಣ್ಣ ಹರಳು!
by ಹರೀಶ್ ಶೆಟ್ಟಿ , ಶಿರ್ವ

ನನ್ನ ಹೃದಯ

ನನ್ನ ಹೃದಯ
ಮಣ್ಣಿನ ಹಣತೆ
ಅದರಲ್ಲಿ ಪ್ರೀತಿಯ ದೀಪ
ಹಚ್ಚಿ ಹೋಗದಿರು
ದುಃಖದ ಗಾಳಿಯಿಂದ ನಂದಿ ಹೋಗುವೆ!

ನನ್ನ ಹೃದಯ
ಕಮಲದ ಹೂವು
ಪ್ರೇಮದ ಸೂರ್ಯ ಕಿರಣ
ಹರಡಿ ಹೋಗದಿರು
ಅಗಲಿಕೆಯ ಅಂಧಕಾರದಲ್ಲಿ ಮುಚ್ಚಿ ಹೋಗುವೆ!

ನನ್ನ ಹೃದಯ
ರಾತ್ರಿಯ ತಮಸ್ಸು
ಹುಣ್ಣಿಮೆ ಚಂದ್ರನ ಅನುರಾಗ ಬೆಳಕು
ಬೀರಿ ಹೋಗದಿರು
ಅಮಾವಾಸ್ಯೆಯ ಕತ್ತಲಲ್ಲಿ ಮರೆಯಾಗಿ ಹೋಗುವೆ !

ನನ್ನ ಹೃದಯ
ಹಳೆ ಗುಡಿ
ದೇವಿಯಾಗಿ ಸ್ತಾಪಿತವಾಗಿ ಪ್ರೇಮ ಪ್ರಸಾದ
ನೀಡಿ ಹೋಗದಿರು
ನಿನ್ನ ಅನುಗ್ರಹವಿಲ್ಲದೆ ಕೊರಗಿ ಹೋಗುವೆ !
by ಹರೀಶ್ ಶೆಟ್ಟಿ, ಶಿರ್ವ

ವಂಚಕ

ಮೋಸ ಕಪಟ
ವಿಶ್ವಾಸ ಘಾತಕ
ಅವನು ವಂಚಕ

ಮನೆ ಹಾಳು ಲಕ್ಷಣ
ಸೋಮಾರಿ ಅಲೆಮಾರಿ
ಬಾಲ್ಯದಿಂದಲೇ ಪಾತಕ

ಗೆಳೆಯರ ಅಲ್ಲ ಸಖ
ಪತ್ನಿ ಕೇವಲ ಕಾಮ ಸುಖ
ಪ್ರೀತಿಯ ಹಂತಕ

ಚತುರ ಚಾಲಕ
ನಿಪುಣ ಯೋಜಕ
ಕಳ್ಳರ ಸಂಚಾಲಕ

ಮನಸ್ಸು ಮಲಿನ
ಗುಣಗಳಿದ್ದು ಹೀನ
ವಿಚಿತ್ರ ವ್ಯಕ್ತಿತ್ವ
by ಹರೀಶ್ ಶೆಟ್ಟಿ,ಶಿರ್ವ