ವಿಸ್ಮಯ

                                                                ಫೋಟೋ ಕೃಪೆ :ಗೂಗಲ್
ಒಹ್ ಸಂಜೆ ಆಯಿತೆ ?
ಸೂರ್ಯನ ಸವಾರಿ ಹೊರಟಿತೆ?
ಮುಪ್ಪು ಬಂದದ್ದು ಗೊತ್ತೇ ಆಗಲಿಲ್ಲವಲ್ಲ?
ಸೂರ್ಯ ದಿನ ಉದಯವಾಗುವಂತೆ
ಯಾಕೆ ಪುನಃ ಯೌವನ ಬರಬಾರದು
ಛೆ ಬೇಡ,
ಪುನಃ ಯೌವನ ಪಡೆದು ಏನನ್ನು ಸಾಧಿಸುವುದು
ನಿಷ್ಠೆಯಿಂದ, ಭಕ್ತಿಯಿಂದ
ಯೌವನದಲ್ಲಿ ಕಷ್ಟ ಪಟ್ಟು
ಜೀವನವನ್ನು ಚಿತ್ರಿಸಿದೆ
ಆದರೆ ಈಗ ಆ ಚಿತ್ರದಲ್ಲಿ ಯಾವ ಬಣ್ಣವೂ ಇಲ್ಲ
ಎಲ್ಲ ಅಳಿಸಿ ಹೋಗಿದೆ
ಬಿಡಿ,
ಆದರೆ ಯಾಕೆ ಪುನಃ ಬಾಲ್ಯ ಬರಬಾರದು
ಮಜಾ ಅಲ್ಲವೇ
ಹ್ಮ್ಮ್ ಎಂಥ ಮಜಾ
ಬಾಲ್ಯದಲ್ಲಿ ಪಡೆದ  ಕಷ್ಟ ಮರೆತು ಹೋಯಿತೇ
ಬೇಡ ಪುನಃ ಆ ತೊಂದರೆ
ಸಾಕು
ಬಾಲ್ಯವೂ ಬೇಡ, ಯೌವನವೂ ಬೇಡ
ಜೀವನದ ಶರತ್ಕಾಲದಲಿ
ಇನ್ನೆಂಥ ಆಸೆ
ಮಕ್ಕಳು ಹೋದರು ಒಂದೊಂದಾಗಿ
ನನ್ನನ್ನು ಅಸಹಾಯ ಬಿಟ್ಟು
ಸ್ನೇಹಿತರು ದೂರವಾದರು
ಇನ್ನು ಈ ಭೂಮಿಯಲಿ ನಾಲ್ಕು ಅಡಿ ಜಾಗ ಸಿಕ್ಕಿದರೆ ಸಾಕು
ಹೇ ಆದರೆ ನನಗೆ ಜಾಗ ಯಾಕೋ ?
ನಾನು ಹಿಂದೂ ಅಲ್ಲವೇ
ಸತ್ತ ನಂತರ ಸುಟ್ಟು ಬೂದಿಯಾಗುವವನು
ಹೋಗಲಿ ಬಿಡಿ,
ಆ ಪರಮಾತ್ಮನ ಇಚ್ಛೆ
ಮಾಡುವ ಎಲ್ಲ ಧರ್ಮ ಕರ್ತವ್ಯ ಪ್ರಾಮಾಣಿಕತೆಯಿಂದ ಮಾಡಿ ಮುಗಿಸಿದೆ
ಆದರೆ ಫಲ ನೀಡುವ ಅವನ ಮನಸ್ಸಲಿ ಏನಿದೆಯೋ ?
ಇನ್ನು ಎಷ್ಟು ಜೀವನದ ಸತ್ಯ ತೋರಿಸುತ್ತಾನೋ ?
ಆಗಲಿ ನೋಡುವ
ಕಣ್ಣು ಯಾಕೋ ಈ ತನಕ ಚುರುಕಾಗಿದೆ
ನೋಡದನ್ನೂ ನೋಡಿ ಆಗಿದೆ
ಈಗ ಎಂಥ ಭಯ
ಕ್ಷಣ ಕ್ಷಣ ಜನರಲ್ಲಿ ಆಗುವ ಬದಲಾವಣೆ ಕಂಡು
ಈಗ ನನಗೆ ಎಲ್ಲವೂ ವಿಸ್ಮಯ
ಕೇವಲ ವಿಸ್ಮಯ....
by ಹರೀಶ್ ಶೆಟ್ಟಿ,ಶಿರ್ವ