ಅಸ್ಪೃಶ್ಯತೆ

ಕೆಲಸವೆಲ್ಲ ಹೊರಗೆ
ನನ್ನಿಂದ ದೂರ ದೂರ ಇರುತ್ತಾಳೆ
ಆ ಮನೆ ಒಡತಿ
ದೂರದಿಂದಲೇ ನಮಸ್ಕಾರ
ಅಸ್ಪೃಶ್ಯ ಅಲ್ಲವೇ ನಾನು
ನನಗೆ ಒಳ ಪ್ರವೇಶವಿಲ್ಲ

ಅವರ ಹೊಲಸುಗಳನ್ನೆಲ್ಲ ತೆಗೆದು
ಅವರ ಬಟ್ಟೆಗಳನ್ನೆಲ್ಲ ಒಗೆದು
ಅವರ ಪಾತ್ರೆಗಳನ್ನೆಲ್ಲ ತೊಳೆದು
ಶುಚಿಗೊಳಿಸಬೇಕು ನಾನು
ಆದರೆ ಅವರ ಬಾವಿಯ
ನೀರು ಕುಡಿಯುವ ಹಕ್ಕು ನನಗಿಲ್ಲ

ಕೂಲಿ ಕೊಡುವಾಗ
ನನ್ನ ಕೈ ಅವಳ ಕೈಗೆ
ಎಲ್ಲೊ ಸ್ಪರ್ಶಿಸುವುದೋ
ಎಂಬ ಹೆದರಿಕೆ ಅವಳಿಗೆ
ದೂರದಿಂದಲೇ ಹಣ ಪಾವತಿ
ನನ್ನ ಶ್ರಮಕ್ಕೆ ಯಾವುದೇ ಮರ್ಯಾದೆ ಇಲ್ಲ

ಚಹಾ ತೆಂಗಿನ ಚಿಪ್ಪಿನಲ್ಲಿ
ತಿಂಡಿ ಬಾಳೆ ಎಲೆಯಲಿ
ಅದೂ ತುಂಬಾ ಅಂತರದಿಂದ ಕೊಡುವ ಕ್ರಮ
ಅದನ್ನು ಕೈಯಿಂದ
ಸ್ವೀಕರಿಸುವ ಹಾಗಿಲ್ಲ
ಬಿಡಿ ನನ್ನ ಹೊಟ್ಟೆಗೆ ಎಂತೋ ಇದೆಲ್ಲ ತಿಳಿದಿಲ್ಲ

ಆದರೆ ಆಶ್ಚರ್ಯ
ಮನೆ ಒಡೆಯನ ಕಣ್ಣು
ಯಾವಾಗಲೂ ನನ್ನ ಮೇಲೆಯೇ
ನನ್ನನ್ನು ವಿನಃ ಕಾರಣ ಸ್ಪರ್ಶಿಸುವುದೆಂದರೆ
ಮೋಜು ಅವನಿಗೆ
ಕಾಮುಕನಿಗೆ ಅಸ್ಪೃಶ್ಯತೆಯ ಗೋಚರವಿಲ್ಲ

ನನ್ನ ದೇಹವನ್ನು
ನುಸುಳಿ ನೆಕ್ಕುವಾಗ
ಈ ಕಾಮುಕ ತನ್ನ ಧರ್ಮ ಜಾತಿ
ಎಲ್ಲ ಮರೆತು ಹೋಗುವನು
ಕಾಮ ತೀರಿದ ನಂತರ
ನನ್ನ ಗುರುತು ಅವನಿಗಿಲ್ಲ

by ಹರೀಶ್ ಶೆಟ್ಟಿ,ಶಿರ್ವ