ಮನೆ ಪಾಲಾಯಿತು ಜನ ಪಾಲಾಯಿತು

ಮನೆ ಪಾಲಾಯಿತು ಜನ ಪಾಲಾಯಿತು
ಮಮತೆಯ ಮಡಿಲು ಕಣ್ಣೀರಾಯಿತು
ಸುಖ ಸಂತೋಷವೆಂಬ ಸರೋವರ
ದುಃಖದ ಸಾಗರವಾಯಿತು !

ಅಂಗಳದ ಮಧ್ಯೆ
ವಿಶಾಲ ಗೋಡೆ ನಿರ್ಮಾಣವಾಯಿತು
ತಂದೆ ಅಣ್ಣನ  ಪಾಲಿಗೆ ಬಂದ
ತಾಯಿಯ ಭಾಗ್ಯ ತಮ್ಮನ ವಶ ಆಯಿತು !

ತಂದೆ ಸಾಕಿದ
ಆ ಮಾವಿನ ಮರದ ಸಿಹಿ ಸಿಹಿ ಹಣ್ಣು
ಆ ಹಣ್ಣ ಮೇಲೆ ಇಂದು ಮಕ್ಕಳ ಸಹಿ ಆಯಿತು
ಸಿಹಿ ಮಧುರ ಸ್ನೇಹ ಇಂದು ಕಹಿ ಆಯಿತು!

ಬಾಲ್ಯದ ಸುಂದರ ಆಟ
ಇಂದು ಸಮರವಾಯಿತು
ಅಣ್ಣ ತಮ್ಮ ಎಂಬ ಸಂಬಂಧಕ್ಕೆ
ವೈರಿ ಎಂಬ ಹೊಸ ನಾಮಕರಣ ಆಯಿತು!

ಮನ ಪಾಲಾಯಿತು
ಧನ ಪಾಲಾಯಿತು
ಹೃದಯದಲ್ಲಿ ದ್ವೇಷ ಮಂಥನ ಶುರುವಾಯಿತು
ಪ್ರೇಮ ಅಮೃತ ವಿಷವಾಯಿತು!
by ಹರೀಶ್ ಶೆಟ್ಟಿ, ಶಿರ್ವ