Friday 30 September 2011

ಕ್ಷಣಿಕ ವ್ಯಾಮೋಹ

ಅರಳುವ ಮುನ್ನ
ಹೂವಿನ ಮೊಗ್ಗನ್ನು 
ಕೈಯಿಂದ ಉಜ್ಜಿ 
ಅದರ ಬಾಳನ್ನು ಮುಗಿಸಿ
ಕೈ ಸುಗಂಧಿಸುವವನೇ

ಅದರ ಸುಗಂಧ
ಕೇವಲ ಅಲ್ಪ ಸಮಯ
ಉಳಿಯುವುದಲ್ಲವೇ

ಹಣಕಾಗಿ ಹೆಣವಾಗಿ
ದೂರ ಇದ್ದು ಬಾಳಿ
ಮಮತೆಯ ಕೊಂದು
ಮಗುವನ್ನು ದೂರ ಇಟ್ಟು
ನೊಂದುವ ತಾಯಿಯೇ

ಹಣದ ಈ ಮಾಯೆ
ಕೇವಲ ಅಲ್ಪ ಸಮಯ
ಉಳಿಯುವುದಲ್ಲವೇ

ಆಡಿ ನಲಿದಾಡಿ
ಅಲ್ಲಿ ಇಲ್ಲಿ ಓಡುವ
ಕೋಳಿಯನ್ನು ಕೊಂದು
ಅದರ ಸಾರನ್ನು
ರುಚಿಸುವವನೇ

ಅದರ ಸವಿ ರುಚಿ
ಕೇವಲ ಅಲ್ಪ ಸಮಯ
ಉಳಿಯುವುದಲ್ಲವೇ

ತನ್ನ ಸ್ವಾರ್ಥಕ್ಕಾಗಿ
ಮಿತ್ರ ಎಂದು ಹೇಳಿ
ಮುಗ್ಧ ಜೀವಿಯನ್ನು
ಬಲು ಸುಲಭವಾಗಿ
ಮೂರ್ಖ ಮಾಡುವವನೇ

ನಿನ್ನ ಸ್ವಾರ್ಥದ ಲಾಭ
ಕೇವಲ ಅಲ್ಪ ಸಮಯ
ಉಳಿಯುವುದಲ್ಲವೇ

ಮರವನ್ನು ಕಡಿದು
ನಿಸರ್ಗವನ್ನು ಬೆತ್ತಲೆ ಮಾಡಿ
ತನ್ನ ಮನೆಯನ್ನು
ಸುಂದರವಾಗಿ 
ಅಲಂಕರಿಸುವವನೇ

ಆ  ಪೀಠೋಪಕರಣಗಳು 
ಕೇವಲ ಅಲ್ಪ ಸಮಯ
ಉಳಿಯುವುದಲ್ಲವೇ
by ಹರೀಶ್ ಶೆಟ್ಟಿ, ಶಿರ್ವ

No comments:

Post a Comment